Dosja “Partizani” është një nga çështjet më të bujshme të drejtësisë shqiptare, me jehonë politike dhe publike të jashtëzakonshme. Në qendër të saj është ish-kryeministri Sali Berisha dhe dhëndri i tij, Jamarbër Malltezi. Fati i tyre tashmë ndodhet në duart e një trupe gjykuese që mund të konsiderohet si “treshe e hekurt” për vendimet e saj ndaj figurave të njohura dhe për ndëshkimin e disa prej aferave më të mëdha korruptive në vend. Shorti përcaktoi dje gjyqtarët Elsa Ulliri, Rudina Palloj dhe Bib Ndreca për të vendosur për dosjen “Partizani”. Profili i secilit prej tyre tregon një histori të pasur përballjeje me raste të rëndësishme, përfshirë aferën e inceneratorëve, çështje të krimit të organizuar dhe zyrtarë të nivelit të lartë që kanë përfunduar pas hekurave.
Detajet
Dy prej anëtarëve të treshes gjykuese të aferës Partizani, një prej dosjeve që pritet të ketë vëmendjen më të madhe në muaj në vazhdim, janë në GJKKO vetëm prej 2 vitesh e gjysmë. Kryesuesja Elsa Ulliri dhe gjyqtarja Rudina Palloj janë emëruar në tetor të vitit 2022, ndërsa anëtari tjetër Bib Ndreca kaloi në Gjykatën e Posaçme si pjesë e ish gjykatës së krimeve të rënda. Ulliri dhe Palloj janë brezi i ri i gjyqtarëve të Shqipërisë, të palidhura deri tani me çështje të errëta.
Të dyja e kanë kaluar procesin e vettingut me vendime unanime në Komisionin e Pavarur të Kualifikimit, të pranuara dhe të paankimuara në KPA nga ONM dhe komisionerët publikë. Gjatë seancës dëgjimore për Elsa Ullirin qershorin e vitit 2022, gjyqtarja u pyet dhe dha shpjegime për një bilanc negativ të familjes në vlerë të vogël dhe për disa vendime penale lidhur me kriterin profesional. Për pastërtinë e figurës, Drejtoria e Sigurimit të Informacionit të Klasifikuar kishte dorëzuar në Komision dy raporte të kundërta, i dyti negativ që në atë kohë u cilësua prej Ullirit si “fyes dhe zhgënjyes”.
Elsa Ulliri përfundoi studimet në Shkollën e Magjistraturës në vitin 2014 dhe prej asaj kohe ushtroi funksioni i gjyqtares në Gjykatën e Rrethit Gjyqësor Lezhë deri në vitin 2022 kur u delegua në GJKKO. Elsa ka dhënë vendime të forta gjatë këtyre 2 viteve e gjysmë si gjyqtare e posaçme si dënimi i ish kryebashkiakëve socialistë Vangjush Dako dhe Edison Memolla apo vendime për çështjet e inceneratorëve.
Dosjet e tjera
Edhe për Rudina Pallojn Komisioni i Pavarur i Kualifikimit arriti në përfundimin se ajo ishte pa probleme në të tria kriteret, pas një seancë të lehtë dëgjimore janarin e vitit 2022. Pallojit nuk iu kalua barrë prove në asnjë prej kritereve, por i ishin kërkuar shpjegime pas disa denoncimeve në kriterin e profesionalizmit. Rudina Palloj përfundoi studimet në Shkollën e Magjistraturës në vitin 2011 dhe punoi fillimisht si gjyqtare në Gjykatën e Korçës, më pas në atë të Beratit për 5 vite, si këshilltare ligjore në KLGJ për 3 vite, për t’u emëruar përfundimisht në tetor 2022 në GJKKO-në e shkallës së parë.
Në këto 2 vite e gjysmë gjyqtarja Palloj ka pasur çështje të rëndësishme në dorë si inceneratorët e Tiranës, Elbasanit dhe Fierit, “Toyota Auris” me dënimin e ish kreut të prokurorisë së Vlorës Aurel Zarka, lënia në burg për SASPAC e ish ministrit Beqaj apo edhe çështje të krimit të organizuar si vrasja e Vajdin Lames dhe dosja e trafikut të drogës nga Kolumbia. Bib Ndreca, anëtari i tretë i trupës gjykuese ndaj Sali Berishes dhe dhëndrit Malltezit, ka ardhur nga krimet e rënda në GJKKO por nuk ka punuar gjatë gjithë kohës.
Ai e ka kaloi me sfida procesin e vettingut, pasi u pezullua në detyrë me një vendim shkarkimi të Komisionit të Pavarur të Kualifikimit në janar të vitit 2021 ndërsa Kolegji i Posaçëm i Apelit e rikthye në detyrë në maj 2024, pra më shumë se 3 vite më vonë. Sipas KPK u konstatuan probleme në pasurinë e tij, përfshirë një apartament në Tiranë dhe disa prona të tjera. Probleme që nuk u konsideruan si të tilla nga Kolegji i Posaçëm i Apelimit që prishi vendimin e KPK-së dhe riktheu në detyrë Ndrecën duke i cilësuar të besueshme deklarimet e tij.
Bib Ndreca përfundoi studimet në Shkollën e Magjistraturës në vitin 2009. Ai ka shërbyer si gjyqtar në Tropojë e Pukë, ndërsa në vitin 2015 u dekretua si anëtar i Gjykatës së Shkallës së Parë për Krime të Rënda. Ndreca është i njohur për përfshirjen e tij në çështjen e njohur si “Dosja 339”, ku ka firmosur arrestimin e grupit të Avdylajve në Shijak. Pas këtij vendimi, ai u vendos nën mbrojtje të posaçme nga policia për një periudhë kohe pasi jeta rrezikohej./e.t