Presidenti i Republikës, Ilir Meta ka vlerësuar sot me Titullin “Për Merita të Veçanta Civile” mjekun Grei Malo.
Në njoftimin në faqen zyrtare në Facebook, Meta shkruan se Grei Malo është vlerësuar me këtë titull për kontributin e tij të veçantë humanitar gjatë operacionit të kërkim-shpëtimit pas tërmetit të 26 nëntorit.
“Me nderim dhe mirënjohje të thellë, pata sot privilegjin të vlerësoja me Titullin e lartë “Për Merita të Veçanta Civile”, mjekun hero Grei Malo, i cili zbriti në terren menjëherë pas goditjes së tërmetit tragjik të 26 nëntorit, duke hyrë nën rrënoja e shpëtuar jetë njerëzish në të gjitha zonat e dëmtuara, dhe spikati me kontributin e tij të veçantë humanitar si anëtar i Qendrës Vullnetare të Emergjencave Civile, për shpëtimin e të riut Klajdi Qato.
Mirënjohje Grei Malos që dha një shembull të jashtëzakonshëm të sakrificës dhe profesionalizmit, duke na bërë krenarë dhe gëzuar respektin e të gjithë shqiptarëve!
Mirënjohje të gjithë anëtarëve të Qendrës Vullnetare të Emergjencave Civile!”, shkruan Meta.
