Një nga emrat e njohur dhe të nderuar të mjekësisë shqiptare, Agron Panariti është ndarë nga jeta sot në moshën 74-vjeçare.
Pas një beteje të gjatë me leuceminë, mjeku infeksionist dhe profesori i Universitetit të Mjekësisë mbylli sytë përgjithmonë, duke lënë pas një dhimbje të madhe te familjarët dhe të gjithë ata që patën kënaqësinë dhe nderin të punojnë dhe mësojnë nga ai.
Themeluesi dhe Drejtori i SIGAL, Avni Ponari ka shprehur ngushëllimet e tij përmes një statusi në facebook.
Statusi i Plotë
Ndarja papritur nga jeta e Prof.Asc.Dr. Agron Panariti na trishtoi të gjithëve…
Humbje e madhe për familjarët, miqtë, por edhe për SIGAL UNIQA Group Austria, së cilës iu përkushtua me eksperiencën e tij të gjatë në misionin vizionar të Klinikës Lëvizëse.
Agroni karakterizohej nga përkushtimi dhe fisnikëria ndaj mijëra pacientëve, e të gjitha këto karakteristika të tij i përçoi në çdo qytet, në çdo fshat dhe në çdo rrugë ku Klinika SIGAL ka shërbyer.
Ndaj sot është mjaft e vështirë të ndahesh me një mik të mirë, një mjek humanist që e donte dhe e respektonte shumë bluzën e bardhë, një njeri i mrekullueshëm që shërbente jo vetëm me dije profesionale, por edhe me fjalë të ngrohta që i buronin nga zemra.
Ai ishte një nga bashkëpunëtorët më të mirë të Klinikës Lëvizëse SIGAL, duke i dhënë profesionalizmin një projekti novator dhe unik në të gjithë rajonin, për të ofruar ekzaminime falas për qytetarët.
Me hidhërim i bashkohem sot dhimbjes së bashkëshortes dhe dy djemve të tij. Agroni do të kujtohet përherë për fisnikërinë dhe maturinë e treguar, e do të na mungojë në rrugëtimin tonë drejt mundësive të reja.
Pushofsh në paqe Doktor Agron Panariti…
