Kryeministri i Kosovës, Albin Kurti, ka kërkuar nga misioni i NATO-s në Kosovë, KFOR-i, ta garantojë lëvizjen e lirë në veri, duke thënë se ky është edhe misioni i tyre – garantimi i “një ambienti të qetë dhe të sigurt, i cili nënkupton edhe lirinë e lëvizjes pa dallim”.
Pas takimit të Këshillit të Sigurisë së Kosovës, kryeministri Kurti bëri të ditur se po pret që KFOR-i të largojë barrikadat në rrugët e bllokuara në veri. “Ne po presim. KFOR-i po kërkon pak kohë që shpejt ta kryejë këtë punë dhe ne po presim”, u shpreh Kurti të dielën, në një konferencë për media. Lëvizja e lirë është kufizuar në veri të Kosovës pasi janë ngritur barrikada dhe janë bllokuar disa rrugë nga serbët lokal pas arrestimit të ish-pjesëtarit të Policisë së Kosovës, Dejan Pantiq. Ai akuzohet se “ka organizuar sulmin terrorist” ndaj zyrave të Komisionit Qendror të Zgjedhjeve në veri të Kosovës më 6 dhjetor.
Mbulim direkt për ngjarjet në veri
Ministri i Punëve të Brendshme, Xhelal Sveçla, tha se mbrëmjen e 10 dhjetorit janë ngritur gjashtë barrikada në Leposaviq, Zveçan dhe Zubin Potok. Ai tha se pikëkalimet kufitare Jarinje dhe Bërnjak janë ende të mbyllura për arsye sigurie. Sveçla u bëri thirrje serbëve lokalë t’i largojnë barrikadat në veri, ndërsa shtoi se nëse barrikadat nuk hiqen, atëherë do të merren veprimet e duhura, por pa dhënë detaje se për çfarë veprimesh bëhet fjalë. “Bëra apel që këto barrikada të tërhiqen, patjetër që Policia e Kosovës i ka kapacitetet e duhura të veprojë në këtë drejtim. Ajo i bën planet e saj operative dhe në momentin që ata e vlerësojnë të duhur, nëse barrikadat nuk tërhiqen, ata do të ndërmarrin veprimet e duhura”, tha Sveçla. Ai tha se janë në koordinim me partnerët ndërkombëtarë dhe se “shumë shpejt do të mbërrijmë në situatën kur nuk do të ketë më barrikada në veri”. Sipas tij, barrikadat janë vendosur me arsye, siç tha ai, të pengohet dërgimi i Pantiqit në jug, pas caktimit të masës së ndalimit prej 48-orësh. Edhe kryeminstri Kurti u kërkoi serbëve lokalë të distancohen nga grupet kriminale dhe “regjimi i [Aleksandar] Vuçiqit, i cili i financon dhe kërkon luftë”. Ai akuzoi Serbinë se dëshiron të kërcënojë integritetin territorial të Kosovës dhe se dëshiron të destabilizojë gjithë rajonin e Ballkanit. “Tash nuk është në tryezë as çështja e targave ilegale dhe nuk është në tryezë as çështja e zgjedhjeve për kryetarë në katër komunat në veri të Kosovës, andaj duke qenë se kanë ngelur pa pretekste, janë të gatshëm të shpikin gjithçka vetëm e vetëm për të zbatuar planin e tyre për barrikadimin e veriut”, u shpreh Kurti. Situata në veri ka qenë e tensionuar që nga fillimi i nëntorit, kur përfaqësues të komunitetit serb dhanë dorëheqje nga institucionet e Kosovës në veri shkaku i vendimit të Qeverisë së Kosovës për të riregjistruar makinat me targa ilegale serbe në RKS – Republika e Kosovës. Situata ishte qetësuar përkohësisht pas arritjes së një marrëveshje mes palëve kosovare dhe serbe në Bruksel. Por, zgjedhjet ishin planifikuar më 18 dhjetor dhe Lista Serbe – partia më e madhe e serbëve në Kosovë – kishte kundërshtuar mbajtjen e tyre. Të shtunën, presidentja Vjosa Osmani i shtyu ato për në prill të vitit të ardhshëm. Kurti tha se shtyrja e zgjedhjeve ishte për të mirën e komunitetit serb në veri në mënyrë që “ta krijojmë një hapësirë disamujore që të hiqet frika e të votohet lirshëm”.
Vuçiç: Serbët u detyruan t’i ngrinin barrikadat
Presidenti serb, Aleksandar Vuçiç, tha se mesazhi i tij për serbët nga Kosova është se “nuk ka dorëzim dhe nuk do të ketë dorëzim”, duke shtuar se ata janë “detyruar [t’i ngrinin] barrikadat”. Në komunat me shumicë serbe në veri të Kosovës janë ngritur barrikada të shtunën, pas arrestimit të ish-pjesëtari të Policisë së Kosovës, Dejan Pantiç, për shkak të, siç është thënë, dëshmive se ai ka organizuar “sulmin terrorist në zyrat e KQZ-së në veri të vendit”, më 6 dhjetor. Si shenjë pakënaqësie, serbët lokalë kanë ngritur barrikada dhe kanë bllokuar disa rrugë në veri, të cilat mbesin të bllokuara edhe të dielën. “Mesazhi për të gjithë të tjerët është që të formohet Asociacioni [i komunave me shumicë serbe], të respektohen të drejtat dhe liritë e serbëve dhe të sillen në përputhje me marrëveshjet e nënshkruara dhe të drejtën ndërkombëtare, sepse kjo është mënyra e vetme për të filluar normalizimin e marrëdhënieve”, shkroi ai në Instagram më 11 dhjetor. Vuçiç shtoi se autoritetet në Serbi do të vazhdojnë “luftën për paqe me të gjitha mjetet ligjore”. Kryeministri i Kosovës, Albin Kurti, ka thënë se barrikadat e vendosura në veri të Kosovës duhet të hiqen menjëherë dhe se autoritetet e Kosovës janë në kontakt të vazhdueshëm me misionin e NATO-s në Kosovë, KFOR. Ai u bëri thirrje Shteteve të Bashkuara të Amerikës dhe Bashkimit Evropian ta dënojnë atë që ai e quajti “dhunë të organizuar” dhe vlerësoi se çfarëdo veprimi tjetër “do të inkurajojë Beogradin zyrtar për më shumë nxitje për destabilizim të Kosovës”. Përfaqësues të komunitetit serb dhanë dorëheqje nga institucionet e Kosovës në veri të vendit në fillim të muajit nëntor dhe që nga atëherë gjendja në veri ka qenë më e tensionuar. Vuçiç ka paralajmëruar të shtunën se autoritetet serbe do të bëjnë kërkesë te misioni i NATO-s në Kosovë, KFOR, që në përputhje me Rezolutën 1244, të sigurojnë dislokimin e pjesëtarëve të ushtrisë dhe policisë serbe në territorin e Kosovës. Ministri i Punëve të Jashtme i Serbisë, Ivica Daçiç, tha të shtunën se përmes kësaj kërkese, Serbia dëshiron ta bëjë të ditur se komuniteti ndërkombëtar ka obligim t’i mbrojë të gjithë qytetarët e Kosovës. Ai gjithashtu shtoi se tashmë e di përgjigje ndaj kësaj kërkese, duke iu referuar përgjigjes së mëhershme të presidentit serb se ai ishte i bindur se përgjigja do të ishte negative. Ndërkohë, zgjedhjet e planifikuara për më 18 dhjetor në veri të Kosovës janë shtyrë për në muajin prill të vitit të ardhshëm, pas dorëheqjes së kryetarëve të komunave në Mitrovicën e Veriut, Leposaviq, Zveçan dhe Zubin Potok. REL